Hum Ladkiyaan
Hum Ladkiyaan,
Chehakti hui hum chidiyaan
Apna alag aakash hamara
Rang-birangi sapno ki duniya |
Sagar ki gehraai hum me
Mast hava ki tarunaai hum me
Dharti sam vishal hriday hamara
Aur parvat ki unchaai hum me |
Kavi ki hum kalpna hain
Chitrakaar ki prerna hain
Shayar ki hum shayari hain
Aur gungunata geet hum hain |
Humse hai duniya me rangat
Humse ye jahaan khoobsoorat
Ek hansi se gam har lein
Hum me vo jaadui takat |
Gulshan ki bahaar hum se
Payal ki jhankaar hum se
Hum se hai jeevan me sangeet
Aur duniya me pyar hum se |
Hum ladkiyan,
Phoolon ki komal pankhudiyan
Mat maaro garbh me hume
Hum bin neeras hogi duniya
